Jep dorëheqje edhe Frashër Krasniqi

"Çdo sakrificë e vetëmohim, çdo fyerje e përbuzje ishte e kapërdishme, sepse përpara kishim idealet dhe konceptet, bashkë me besimin që askush nuk do të dojë dhe as nuk do të mund të përfitojë personalisht nga sakrificat e të gjithëve”, ka shkruar Krasniqi në letrën e tij

Deputeti Frashër Krasniqi, i cili aktualisht ndodhet në burgun e Dubravës, ka dhënë dorëheqje nga pozita e delegatit të Këshillit të Përgjithshëm dhe çdo pozitë tjetër në Vetëvendosje. Në një letër të dërguar nga burgu i Dobravës, Krasniqi flet për raportet me Albin Kurtin, madje kujton një rast kur ky i fundit e kishte quajtur ‘idiot’.

“Nuk pendohem as për momentet e mosvlerësimit apo nënvlerësimit, sepse nuk ishte vlerësimi personal ajo për të cilën luftonim. As për momentet e këqija, si ajo kur isha drejtues i Sekretariatit për Media, e Albin Kurti më dërgoi e-mail, ku më quajti “idiot” vetëm ngase në faqen e Lëvizjes ia publikova, për të mirën e tij, një foto me familjen e vet, të cilën megjithatë, më vonë ai vetë e përdori për fushatë elektorale. Edhe refuzimin e tij për të më vizituar gjatë tre muajve të parë të arrestit (deri pas vdekjes së Astritit) e edhe mosparaqitjen e tij në asnjë konferencë apo intervistë për të na mbrojtur nga padrejtësitë që po na bëheshin.

Të gjitha ia fala dhe për asnjë nuk jam penduar. Çdo sakrificë e vetëmohim, çdo fyerje e përbuzje ishte e kapërdishme, sepse përpara kishim idealet dhe konceptet, bashkë me besimin që askush nuk do të dojë dhe as nuk do të mund të përfitojë personalisht nga sakrificat e të gjithëve”, ka shkruar Krasniqi në letrën e tij.