Jep dorëheqje kreu i Ushtrisë së Zvicrës

Ai dorëhiqet për shkak të problemeve shëndetësore. Gjendja e tij e përgjithshme fizike nuk është më në përputhje me punën që bën

Kreu i Ushtrisë së Zvicrës, Philippe Rebord, ka njoftuar në mënyrë të befasishme vendimin e tij për dorëheqje nga shkaqe shëndetësore. Oficeri i lartë 62 vjeçar e ka arritur tashmë moshën për pensionim të rregullt. Por Këshilli Federal ia kishte vazhduar atij kontratën deri në fund të vitit 2020, duke synuar kështu ruajtjen e kontinuitetit në kreun e ushtrisë, transmeton albinfo.ch mediet zvicerane.

Veç kësaj, nga ai pritej vazhdimi i reformës së ushtrisë dhe përtëritja e plotë e forcave ajrore dhe të mbrojtjes kundërajrore, dy projekte shumë të mëdha këto. Kështu tash, me njoftimin për dorëheqje të shefit të ushtrisë, krijohet një vakuum në udhëheqjen e saj.

Siç ka bërë të ditur fillimisht gazeta Tages Anzeiger, Rebord ka njoftuar për dorëheqjen e parakohshme të cilën ai e ka caktuar për në fund të këtij viti. Ai dorëhiqet për shkak të problemeve shëndetësore. Një nyje e dëmtuar rëndë e komblikut të tij e kufizon në atë masë sa që gjendja e tij e përgjithshme fizike nuk është më në përputhje me punën që bën.

Rebord është në krye të Ushtrisë së Zvicrës nga viti 2017.

Ndërkaq, siç merr vesh Tages Anzeiger, përveç Rebord-it, punën në ushtri do ta braktisë edhe shefi për trajnim, Daniel Baumgartner. Nga tre komandantët e korpuseve, në kreun e armatës mbetet kështu vetëm zëvendësu i Rebord-it, Aldo C. Schellenberg 60 vjeçar.

Pas dorëheqjes së dyfishtë, fjalën e ka ministrja e mbrojtjes në Qeverinë Federale, Viola Amherd, përcjell albinfo.ch. Përveç me projektet e përmendura, asaj tash do t`i duhet të merret edhe me vendime të rëndësishme për ndryshimet në personel.

---