Jep dorëheqjen ministri austriak i shëndetësisë

Një javë më parë ai kishte pësuar një kolaps të dytë të qarkullimit të gjakut, njofton ministri 60 vjeçar

Ministri i Shëndetësisë i Austrisë Rudolf Anschober (Të Gjelbrit) ka njoftuar dorëheqjen e tij për arsye shëndetësore. Një javë më parë ai kishte pësuar një kolaps të dytë të qarkullimit të gjakut, njofton ministri 60 vjeçar, shkruajnë mediat austriake.

“Kam konstatuar se tani duhet të tërheq frenin e urgjencës. Vendi ka nevojë për një ministër shëndetësor të përshtatshëm në këtë fazë”, është shprehur Anschober, transmeton albinfo.at.

Që nga fillimi i qeverisë së përbërë nga konservatorët (ÖVP) dhe të Gjelbrit, në janar të vitit 2020, Anschober ka drejtuar departamentin e shëndetësisë, i cili u bë departamenti kryesor për shkak të pandemisë.

Ai ka mbajtur këtë post praktikisht për 14 muaj.

Në verën e vitit 2020, falë qasjes së tij objektive rreth krizës së pandemisë, ai qe bërë aq i popullarizuar sa që herë pas here ka arritur të “rrëzojë” Kancelarin Sebastian Kurz (ÖVP) nga vendi i parë në barometrin politik të popullaritetit të politikanëve federalë.

Megjithatë, ai konsiderohej gjithashtu përgjegjës për gabime të shumta teknike në “vërshimin” e urdhëresave që ministria e drejtuar nga ai lëshoi ​​gjatë pandemisë, përcjell albinfo.at.

Kohët e fundit, ai gjithashtu është kritikuar për problemet e fillimit të vaksinimit dhe dështimet në sferën e komunikimit.

---