Jepet premiera e filmit “Glass” në Londër  

M. Night Shyamalan, regjisori i njohur për filmat e tij që kryesisht përfundojnë në mënyrë misterioze, e solli projektin e tij të fundit përpara publikut londinez. 

Të mërkurën u shfaq premiera e filmit të bazuar në libra komikë, “Glass”, që e sjell historinë e përzier të dy filmave paraprakë. Me protagonistë aktorët Bruce Willis, Samuel L. Jackson dhe James McAvoy, “Glass” i ngërthen në vete dy histori, atë të filmit “Unbreakable”, i cili u lansua në vitin 2000 dhe atij “Split” të publikuar nëpër kinema në vitin 2016, përcjell albinfo.ch

Yjet hollywoodian, Willis dhe Jackson, të cilët po ashtu kanë luajtur bashkë në filmin “Unbreakable”, në premierë shoqëroheshin nga aktori McAvoy, i cili e portretizoi rolin e Kevin Wendell Crumbit, një burrë me disa personalitete, në filmin “Split”. 

Në filmin e ri, Willis e përsërit rolin e tij të rojës David Dunn, i cili vihet në ndjekje të personazhit të McAvoyit. Ndërsa, Jackson rikthehet në ekran si Elijah Price, ndryshe i njohur si Mr Glass. Në filmin “Glass”, gjithashtu luajnë aktorët Anya Taylor-Joy dhe Sarah Paulson. “Glass” do të fillojë së shfaquri nëpër kinematë e Amerikës dhe Britanisë së Madhe nga 18 janari.