Johnson e paralajmëron Putinin

(KEYSTONE/DPA/Kay Nietfeld)

Boris Johnson paralajmëroi Rusinë se Londra do të vendosë sanksione në rast se sulmon Ukrainën.

“Mendoj se është jetike që në Moskë ta kuptojnë se sanksionet tona do të aplikohen automatikisht në momentin kur do të sulmohet sovraniteti dhe integriteti territorial i Ukrainës. Unë e di se ky është edhe qëndrimi i aleatëve tanë amerikanë dhe ajo që shpresojmë është që të kthehet sa më parë në një qëndrim të përgjithshëm”, deklaroi Johnson.

Presidenti ukrainas, Volodymyr Zelenskij, deklaroi se një konflikt ushtarak me Rusinë nuk do të përfshinte vetëm Ukrainën, por do të çonte në një luftë me gjithë Evropën.

“Do të ishte një tragjedi nëse ndaj vendit tonë do të kishte një përshkallëzim. Prandaj, po e them hapur se kjo nuk do të ishte vetëm një luftë mes Ukrainës dhe Rusisë. Do të ishte një luftë në shkallë evropiane, sepse askush nuk jep më copëza të territorit të tij”, tha Volodymyr Zelenskij, president i Ukrainës.

Nga ana tjetër, presidenti rus, Vladimir Putin, me tone sfiduese kritikoi Perëndimin, duke e akuzuar se vazhdon të injorojë shqetësimet e Rusisë sa i takon sigurisë dhe po krijon një skenar që çon drejt luftës.

“Nuk po shohim një qëndrim të shëndetshëm ndaj 3 kërkesave tona: parandalimi i ekspansionit të NATO-s, heqja e armatimeve pranë kufijve të Rusisë dhe kthimin e komplekseve ushtarake të Aleancës në pozicionet e vitit 1997, kur u nënshkrua marrëveshja NATO-Rusi”, tha Putin.

Rusia ka vendosur mbi 100 mijë trupa në kufirin ukrainas, duke bërë që Perëndimi të druhet për një pushtim të mundshëm.

Po të martën, sekretari amerikan i Shtetit, Antony Blinken, i kërkoi homologut rus, Sergei Lavrov, tërheqjen e trupave, nëse me të vërtetë Rusia nuk dëshiron luftë./Euronews