Juncker: Kosova duhet ta ratifikojë demarkacionin

Presidenti i Komisionit Evropian, Jean-Claude Juncker, bashkë me përfaqësuesen e lartë të BE-së, Federica Mogherini, dhe komisionarin Johannes Hahn, janë duke qëndruar në Prishtinë në kuadër të turneut të tyre ballkanik

Presidenti i Komisionit Evropian, Jean-Claude Juncker, ua ka bërë me dije liderëve kosovarë rëndësinë që ka ratifikimi i Demarkacionit me Malin e Zi. Ai, me këtë rast, iu ka dërguar porosi edhe deputetëve serbë, duke thënë se nga kjo përfitojnë të gjithë qytetarët.

Junker deklaroi se nuk e kënaq ideja që kosovarët janë të vetmit në rajon që nuk mund të udhëtojnë lirshëm por shtoi se duhet bërë progres edhe në luftën kundër korrupsionit.

Presidenti Hashim Thaçi, pas takimit, tha se Kosova është krenare që është ndërtuar me vlerat dhe praktikat e mira të BE-së. Sipas tij, BE-ja është synim i së ardhmes së Kosovës. Presidenti nuk ka dashur të komentojë mosratifikimin e demarkacionit në seancën e sotme të Kuvendit të Kosovës, duke shprehur besimin se një gjë e tillë do të ndodhë ditëve të ardhshme.

Presidenti i Komisionit Evropian, Jean-Claude Juncker, bashkë me përfaqësuesen e lartë të BE-së, Federica Mogherini, dhe komisionarin Johannes Hahn, janë duke qëndruar në Prishtinë në kuadër të turneut të tyre ballkanik për të prezantuar Strategjinë e BE-së për këtë rajon.