Kabashi: Keqpërdoruesit e votës nuk i shpëtojnë ndëshkimit

Kryeprokurori ka urdhëruar shtatë prokuroritë komunale që të fillojnë ndjekjen penale në rastet me dëshmi keqpërdorimi të votave

Keqpërdoruesit e votës nuk do të mbesin të pandëshkuar. Kështu është zotuar kryeprokurori i shtetit, Ismet Kabashi në një intervistë për programin në gjuhën shqipe të BBC-së. Ai ka paralajmëruar ngritjen e padive ndaj personave që kanë bërë keqpërdorime gjatë zgjedhjeve, po qe se gjenden prova ndaj tyre.

Kryeprokurori ka thënë se ka urdhëruar shtatë prokuroritë komunale që të bëjnë mbledhjen e materialeve që kanë të bëjnë me procesin zgjedhor dhe të fillojnë ndjekjen penale në të gjitha ato raste ku gjenden dëshmi të mjaftueshme për këtë.

Kryeprokurori i Kosovës ka vendosur të marrë këtë hap pasi Paneli Zgjedhor për Ankesa dhe Parashtresa pas shqyrtimit të ankesave të subjekteve politike, ka vërtetuar një numër parregullsish serioze në ditën e zgjedhjeve. Për shkak të parregullsive në fjalë Komisioni Qendror i Zgjedhjeve ka urdhëruar përsëritjen e votimeve në pesë komuna dhe rinumërimin e votave në 40 për qind të vendvotimeve.

Kabashi ka thënë për BBC-në se prokuroritë komunale kanë afat 15 ditë për të raportuar për punën e tyre dhe më pas do të shihet nëse ekzistojnë dëshmi për të nisur procedurat penale ndaj individëve të caktuar.