Kampi Bondsteel para mbylljes

Kampi i ushtrisë amerikane në afërsi të Ferizajt, Bondsteel mund të mbyllet shumë shpejtë. Paralajmërimi për mbylljen e këtij kampi që është hapur në vitin 1999 nga ushtria amerikane, pas ndërhyrjes të NATO-s, është bërë nga ambasadori i SHBA-ve në Kosovë, Christopher Dell.

Gjatë një interviste për Balkan Insight, Dell ka thënë se janë vetëm një mit fjalët që Bondsteel është ndërtuar dhe përdoret për të shpërndarë energjinë apo fuqinë e SHBA-së në rajon. Sipas tij, ky kamp është një barrë e rëndë financiare, prandaj si pjesë e zhvillimit strategjik, asetet e ushtrisë amerikane në rajon do të tërhiqen.

Dell ka thënë se Bondsteel është një detyrim i madh, një pronë shumë e shtrenjtë, dhe SHBA-të nuk dëshirojnë ta mbajnë më shume sesa që është e domosdoshme. Ambasadori amerikan ka vlerësuar se Kosova është duke rënë në pozita më poshtë në agjendën e SHBA-së, pasi qe problemet e rajoneve të tjera marrin prioritet më të madh.

“Ju mund ta vëreni se presioni i ngjarjeve në vendet tjera, siç është gjendja e vazhdueshme ne Afganistan, apo edhe vala gjithnjë e në rritje e protestave në Lindjen e Mesme, i bën të gjithë politik-bërësit të merren me gjerat më të rëndësishme të ditës.

Nuk është mire të jesh në ballinën e ‘The Washington Post’, pasi që kjo do të thotë që, ju jeni një vend në telashe. Fakti që Kosova është hequr nga ballinat e gazetave, do të thotë që kjo është një shenjë e progresit të vazhdueshëm dhe e stabilitetit këtu”, ka thënë ambasadori amerikan në Kosovë.