Kancelari Kurz mbledh në Vjenë liderët e Ballkanit Perëndimor

Kryeministri Ramush Haradinaj, në takimin e liderëve të vendeve të Ballkanit Perëndimor në Vjenë të Austrisë ka kërkuar nga kancelari Sebastian Kurz që liberalizimi i vizave të futet në agjendën e BE-së. Sipas kryeministrit Haradinaj, Kosova ka përmbushur të gjitha kriteret e vëna nga BE-ja.

“Përveç së drejtës sonë për lëvizje të lirë, liberalizimi i vizave për Kosovën do të thotë më shumë partneritet, më shumë treg e mundësi këmbimi për vendet e BE-së dhe rajonit”, ka thënë kryeministri.

Në këtë takim, Haradinaj ka thënë se i ka njoftuar se Kosova është e përkushtuar në fuqizimin e bashkëpunimit rajonal dhe e gatshme të marrë përsipër obligimet e saja, por se kjo duhet të jetë reciproke.

Kancelari Kurz ka thënë se Austria është historikisht partner i fortë i vendeve të Ballkanit Perëndimor.

“Mendojmë se Bashkimi Evropian është i kompletuar vetëm atëherë kur vendet e Ballkanit Perëndimor të jenë pjesë e BE-së. Stabiliteti i Evropës është i varur nga stabiliteti i vendeve të Ballkanit”, ka theksuar ai. Ndërkaq, komisioneri Hahn ka thënë se ky është një rast i mirë për të diskutuar dhe për të larguar të gjitha barrierat që vendet e Ballkanit i kanë mes vete.