Kanë rënë investimet e huaja në Kosovë

Zyrtarë të Agjencisë për Promovimin e Investimeve për rënien e interesimit të investuesve të huaj fajësojnë krizën ekonomike globale

Drejtori i Agjencisë për Promovimin e Investimeve në kuadër të Ministrisë së Tregtisë dhe Industrisë, Mustafë Hasani, ka theksuar se vazhdimisht është punuar për tërheqjen e investimeve, me anë të vizitave, promocioneve dhe panaireve të ndryshme në vende të Evropës, dhe sipas tij tashmë po vërehen edhe rezultatet pozitive.

Ndryshe nga raporti i Bankës Botërore, ku thuhet se gjatë vitit 2010 investimet e huaja në Kosovë kanë qenë 265 milionë euro, Hasani thotë se investimet në vitin 2010 kanë qenë 314 milionë.

Por, ekspert të ekonomisë vlerësojnë se nuk është bërë sa duhet për tërheqjen e investitorëve të huaj.

Kryetari i Aleancës Kosovare të Bizneseve, Agim Shahini, konsideron se rënia e vazhdueshme e investimeve të huaja vjen si rezultat mungesave të politikave investuese, tregtare dhe fiskale.

Ai ka deklaruar se edhe ato investime që kanë ndodhur kanë qenë si rezultat i procesit të privatizimit.