Kantonet kanë nisur dënimet e para të shkelësve të karantinës

Që nga 6 korriku, karantina është e detyrueshme pas hyrjes nga vendet e "listës së rrezikut" për koronavirus. Tashmë janë kapur shkelësit e parë

Kantonet kanë kapur shkelësit ose anashkaluesit e parë të karantinës, pasi kanë kontrolluar listat e pasagjerëve në aeroporte.

Sipas një hulumtimi të bërë nga “SonntagsBlick”, autoritetet në kantonet si:  Glarus, Graubünden, Obwalden, Solothurn, Zug dhe Cyrih kanë raportuan deri në 10 persona që kanë hyrë në Zvicër nga vendet e rrezikut por duke anashkaluar karantinën.

Shuma e gjobës për ta nuk është përcaktuar ende pasi që procedimet e rasteve përkatëse janë në vazhdim, transmeton albinfo.ch. Kontrollet e të dyshuarve bëhen përmes telefonit dhe postës elektronike. Por, gjithashtu ndiqen edhe informacionet që rrjedhin nga popullata.

Të gjithë atyre që tregohen të pabindur do t’u dërgohet një urdhër karantinë nga zyra e mjekut kantonal, thuhet në raport, përcjell albinfo.ch. Shumica e kantoneve u janë qasur “diplomatikisht” rasteve të dyshuara, për shembull përmes letrave të dërguara nga autoritetet ose përmes kontrolleve të policisë.

Sipas Ligjit për epidemitë, kushdo që shmang karantinën mund të dënohet me gjobë, maksimumi 10,000 franga, ndërsa në raste pakujdesie, me gjobë deri në 5000 franga.

Kantonet janë përgjegjës për ndjekjen penale.

---