Kantoni i Cyrihut zgjedh sot parlamentin dhe qeverinë

Aleanca për Klimën (PS, të Gjelbërit, GLP, EVP dhe AL) pritet të kenë numër të njëjtë vendesh si partitë e djathta (SVP, FDP, Mitte dhe EDU), 90 me 90

Elektorati i kantonit të Cyrihut zgjedh sot anëtarët e Qeverisë dhe të Parlamentit Kantonal, transmeton albinfo.ch. Rezultatet e këtyre zgjedhjeve janë një tregues i rëndësishëm për zgjedhjet kombëtare që do të mbahen këtë vjeshtë.

Të shtatë anëtarët e deritashëm të qeverisë pritet të fitojnë rizgjedhjen. Pas numërimit të 169 nga 174 komunat, të gjithë ata kanë arritur plusin absolut.

Në Parlamentin kantonal “aleanca klimatike” rrezikon të humbasë shumicën e saj, shkruan srf.ch. Sipas parashikimeve të fundit, do të ketë një ngërç në rezultat: Aleanca Qytetare dhe Aleanca për Klimën pritet të marrin secila nga 90 vende.

Çdo projeksion jep një pamje pak më të mirë për PS-në në Parlamentin kantonal të Cyrihut. Sipas projeksionit të fundit bazuar në 157 komuna të numëruara, socialdemokratët do të fitojnë një vend.

Kjo do të çonte në një ngërç në Parlamentin kantonal të Cyrihut, përcjell albinfo.ch. Aleanca për Klimën (PS, të Gjelbërit, GLP, EVP dhe AL) do të kishte saktësisht të njëjtin numër vendesh si partitë e djathta (SVP, FDP, Mitte dhe EDU) – 90 me 90.

Shpërndarja përfundimtare e mandateve mund të bëhet vetëm kur të jenë të disponueshme rezultatet nga të gjitha komunat. Rezultati përfundimtar pritet rreth orës 18:00.

Në zgjedhjet parlamentare janë duke marrë pjesë 17 kandidatë me rrënjë shqiptare, kryesisht nga SP (Partia Socialdemokrate) dhe FDP (Partia Liberale).

Në mandatin e mëparshëm ishte zgjedhur deputete Qëndresa Sadriu-Hoxha, si e para shqiptare në këtë post. Ajo ka kandiduar sërish edhe në zgjedhjet e sotme.

---