Kantoni do t`i dënojë lypësit me 100 franga gjobë, Gjykata Federale shtyn vendimin

Gjykata Federale ka marrë vendimin që ndalimi i kërkimit lëmoshë në Kantonin e Vaudit të mos hyjë në fuqi njëherë për një herë. Nuk ekziston ndonjë nevojë urgjente që të bëhet kjo

Vaud-i është një kanton frankofon i Zvicrës. Parlamenti dhe qeveria e kantonit para rreth një viti kishin vendosur të penalizonin lypësit e rrugëve dhe sigurisht edhe organizatorët e tyre kur lypësia dëshmohej se ishte e organizuar.

Me këtë po miratohej një iniciativë parlamentare e partisë UDC/SVP, shkruan srf.ch. Dënimi që në bazë të kësaj ndalese do të merrte një lypës, do të ishte gjoba prej 100 frangash. Ndërsa ata që këtë “profesion” e ushtrojnë në mënyrë të organizuar ose që i detyrojnë të miturittë kërkojnë lëmoshë, mund të dënoheshin me një gjobë deri në 2000 franga.

Por, njëherë për njëherë kjo iniciativë nuk do të mund të jetësohet. Kjo, si rezultat i kritikave që kishin bërë shoqatat e romëve dhe vetë lypësit, transmeton albinfo.ch. Ato pastaj ishin konkretizuar në një ankesë që i ishte dërguar Gjykatës Federale, si shkalla më e lartë e gjyqësisë në vend.

Kjo e fundit ka marrë së fundi vendimin që ndalimi i kërkimit lëmoshë në Kantonin e Vaudit të mos hyjë në fuqi njëherë për një herë. Nuk ekziston ndonjë nevojë urgjente që të bëhet kjo, ka qenë arsyetimi i Gjykatës.