Kaq do të jenë pagat e mësimdhënësve me rritje

SBASHK ka bërë me dije se greva në arsim do të ndërpritet pasi kanë arritur një marrëveshje të re me Qeverinë e Kosovës.

Nënkryetari i SBASHKU-ut, Lutfi Mani, ka thënë për “klankosova.tv” se është arritur marrëveshje e re, por se kjo nuk është më e mira e mundshme.

“Qeveria ka pranuar që të rritë koeficientin për mësimdhënësit dhe pagat do të jenë me rritje”, tha Mani, përcjell albinfo.ch.

Në një dokument të siguruar nga “Klan Kosova” janë rrogat me rritje që do të marrin punëtorët e arsimit parauniversitar.

Kështu mësimdhënësit në shkollat e mesme të larta do të kenë një pagë bazë prej 621 euro, dhe nëse kanë përvojë 15-vjeçare, pagat e tyre do të jenë 668 euro.

Mësimdhënësit në shkollat e mesme të ulëta do të kenë një pagë bazë prej 585 euro, dhe me 15 vite përvojë punë, paga shkon në 629 euro.

Mësimdhënësit në shkollat fillore do të kenë pagë bazë prej 549 euro, kurse mësimdhënësit në shkollat parashkollore 535 euro.