Kërkesa për shfuqizim të Speciales nuk është mbyllur

Kërkesa për seancë të jashtëzakonshme për shfuqizimin e Ligjit për Gjykatën Speciale, që dështoi më 22 dhjetor, do të mbetet edhe më tej.

Sipas deputetit të PDK-së, Nait Hasani, kërkesa për shfuqizim të Speciales është me qëllim të ndryshimit të karakterit etnik dhe të mos ketë gjykim vetëm për pjesëtarët e Ushtrisë Çlirimtare të Kosovë, por për të gjithë që kanë kryer krime.

“Ne e kundërshtojmë. E kam kundërshtuar dhe do ta kundërshtoj një gjykatë të tillë sepse nuk është një gjykatë që e dënon krimin, por që kërkon të dënojë Ushtrinë Çlirimtare të Kosovës për çlirimin që e ka bërë. Kërkesa ime personale dhe e 43 të nënshkruarve, ka qenë, është dhe do të mbetet si kërkesë drejtuar Kuvendit për shqyrtimin e plotësim ndryshimin e ligjit, nga një Gjykatë Speciale që është tash me Dhoma të Specializuara, të krijohet një gjykatë në Kosovë, e cila do të merret me trajtimin e rasteve të dyshuara për krime edhe të komuniteteve të tjera, sikurse krimet serbe në Kosovë”, ka thënë Hasani për “Radion Evropa e Lirë”.

Vetë presidenti i vendit, Hashim Thaçi, ka thënë se nisma e 43 deputetëve, që dështoi dy herë, nuk është mbyllur si çështje akoma.

LDK-ja në anën tjetër vazhdon të mbetet kundër kësaj nisme duke thënë se “të gjitha institucionet duhet të marrin përgjegjësi për trajtimin e krimeve që kanë ndodhur në vendin tonë”.

Ndërsa, sa i përket Vetëvendosjes, kjo parti vazhdon ta konsiderojë Specialen si gjykatë të padrejtë për Kosovën. Deputeti i kësaj partie Rexhep Selimi thotë se dyshon që kjo është iniciativë e vërtetë për rrëzim të Speciales.

“Nuk është hera e parë që iniciativat nuk i kemi parë prej nga kanë ardhur, por çfarë janë ato. Po ta kishim parë se prej nga ka ardhur iniciativa, që ka ngelur vetëm iniciativë, për ndryshimet kushtetuese për Forcat e Armatosura, ne do ta votonim kundër, por ne jemi deklaruar ‘për’ sepse është interes i Kosovës. Kështu që, prapë të njëjtën qasje do ta kemi. Ne do të jemi kundër kësaj gjykatë dhe do ta manifestojmë me votën tonë në seancë, kurdo që do të vjen. Po them, kurdo që të vjen, nëse vjen ndonjëherë, për arsye që ne kemi dyshimin e bazuar se ky mund të jetë thjeshtë një manipulim i (Hashim) Thaçit, në këtë rast dhe duket që mund mundë të ngelet më shumë në kufijtë e një kërcënimi sesa të një iniciative”, ka thënë Selimi.