Këshilli Europian rekomandon kufizim të udhëtimeve

Këshilli Europian ka rekomanduar vendosjen e kufizimeve të udhëtimit për personat që vijnë nga Shtetet e Bashkuara, pas rritjes së infektimeve dhe shtrimeve në spital. Duke nisur nga kjo javë, janë hequr nga lista e vendeve të sigurta edhe Kosova, Maqedonia e Veriut, Izraeli, Libani dhe Mali i Zi.

Në qershor, Europa rihapi kufijtë e saj për amerikanët, me qëllim nxitjen e turizmit. Por Shtetet e Bashkuara nuk bënë të njëjtën gjë, duke lënë shumë qytetarë europianë jashtë kufijve.

Megjithatë, vendet e Bashkimit Europian nuk janë të detyruara të zbatojnë këtë rekomandim dhe do të zgjedhin vetë nëse duan të vendosin kufizime ndaj këtyre shteteve. Rekomandimet e Këshillit Europian do të rishikohen pas dy javësh.