Këshilli Kombëtar i Zvicrës miraton 1 milion franga për luftën kundër dhunës me bazë gjinore

Këshilli Kombëtar i Zvicrës ka rënë më në fund dakord të ndajë një milion franga shtesë për luftën kundër dhunës me bazë gjinore. Buxheti federal i dedikuar organizatave që luftojnë dhunën ndaj grave do të rritet kështu me një milion franga.

Pas një votimi fillestar kundër kësaj mase, Këshilli Kombëtar e rishikoi qëndrimin e tij të hënën, përballë reagimit të fortë publik dhe kundërshtimit nga Këshilli i Shteteve.

Buxheti i parashikuar për masat që lidhen me barazinë gjinore do të arrijë në 8.17 milionë franga vitin e ardhshëm. Deputetët e miratuan këtë rritje me 115 vota pro dhe 72 kundër. Fillimisht, Këshilli Federal kishte propozuar një buxhet prej 7.17 milionë frangash, ndërsa rritja u propozua nga Këshilli i Shteteve. Vetëm Partia Popullore Zvicerane (SVP/UDC) e kundërshtoi shtesën, por kundërshtimi i saj nuk u pranua.

Vendimi erdhi pas një vale të fortë indinjate publike. Disa qindra persona u mblodhën javën e kaluar në Sheshin Federal në Bernë, pasi Këshilli Kombëtar kishte refuzuar fillimisht ndarjen e milionit shtesë. Po ashtu, gati gjysmë milioni njerëz kanë nënshkruar një peticion kundër këtij vendimi.

Sipas të dhënave, këtë vit në Zvicër janë regjistruar tashmë 27 femicide, ndër raste të tjera të dhunës ndaj grave.