KFOR-i i dorëzon policisë kosovare kufirin me Maqedoninë

Policia e Kosovës i ka marrë nga KFOR-i përgjegjësitë për pjesën e fundit të vijës kufitare me Maqedoninë.

Në një ceremoni të organizuar në zonës kufitare në  Zllakuqan të Ulët është bërë pranim – dorëzimi i përgjegjësive kufitare nga KFOR-i tek Policia e Kosovës.

Finalizimi i dorëzimit të kompetencave është bërë nga komandanti i KFOR-it, gjenerali Erhard Buhler, bën të ditur Radio Evropa e Lirë.

Policia e Kosovës pas marrjes së plotë të përgjegjësisë nga KFOR-i të vijës kufitare me shtetin e Shqipërisë të cilën e ka realizuar kohë më parë, tani pranoi edhe marrjen e përgjegjësisë së plotë të vijës kufitare me Maqedoninë dhe në një të ardhme të afërt pritet te vazhdoje marrjen e përgjegjësive tjera me Malin e Zi.

Në këtë ceremoni të pranishëm kanë qenë edhe Drejtori i Përgjithshëm i Policisë, Reshat Maliqi, Ministri i Punëve të Brendshme Bajram Rexhepi dhe përfaqësues të tjerë të institucioneve vendore dhe ndërkombëtare.