Kirurgët në QKUK i heqin tumorin në fytyrë një 82-vjeçari

“Operacioni ka zgjatur mbi 5 orë,  pacientit i është bërë largimi kirurgjik i masës së madhe tumorale në tërësi, në mënyrë radikale..."

Në Klinikën e Kirurgjisë në QKUK është bërë për herë të parë një operacion specifik, ku një pacienti të moshës 82-vjeç i është bërë heqja e tumorit me dimension 30 x 20 centimetra.

“Operacioni ka zgjatur mbi 5 orë,  pacientit i është bërë largimi kirurgjik i masës së madhe tumorale në tërësi, në mënyrë radikale, ku për shkak të zbulimit të strukturave vitale anatomike të kokës dhe qafës është bërë mbulimi me muskulin e madh të gjoksit të anës së majtë të kombinuar me graft (transplant) të lirë lëkuror, nga vetë pacienti”, thuhet në njoftim.

Po ashtu theksohet se gjatë operimit është bërë rregullimi i këndit të majtë të gojës me shtrënguese të lirë të marrë nga dora e djathtë.

Gjendja momentale e pacientit është e mirë dhe stabile, ai është i shtrirë në Klinikën e Kirurgjisë Plastike dhe pritet që gjatë ditëve në vijim të lëshohet për në shtëpi.