KMDLNJ-ja kërkon të mos dekretohet Radomir Llabani si gjyqtar

Llabani të premten u zgjodh gjyqtar i Kushtetueses nga deputetët e Kuvendit të Kosovës, ndërsa menjëherë u ngritën dyshimet për të kaluarën e tij kriminale

Këshilli për Mbrojtjen e të Drejtave dhe Lirive të Njeriut ka kërkuar nga presidenti Hashim Thaçi që të mos e dekretojë Radomir Llabanin si gjyqtar të Gjykatës Kushtetuese, pa u verifikuar e kaluara e tij.

Llabani të premten u zgjodh gjyqtar i Kushtetueses nga deputetët e Kuvendit të Kosovës, ndërsa menjëherë u ngritën dyshimet për të kaluarën e tij kriminale. KMDLNJ-ja thotë se ky është lëshim i atyre që është dashur ta bëjnë verifikimin e së kaluarës të çdo kandidati. Sipas KMDLNJ-së, përzgjedhja e kandidatëve për Gjykatë Kushtetuese duhet të depolitizohet, sikur që duhet të kërkohet një mundësi tjetër e mënyrës së intervistimit.

“Rasti Llaban, nëse del të jetë i vërtetë, tregon qartazi për mungesën e koordinimit mes segmenteve të caktuara të sistemit të sigurisë, e që janë përgjegjëse për verifikimin e së kaluarës për pozita, ku kërkohet sqarimi për të kaluarën.

Nëse rasti ‘Llaban’ është përtej dyshimeve të shprehura në media dhe dëshmohet e kaluara e tij, e cila është në mospërputhje me postin e synuar dhe, për fat të keq, të votuar nga deputetë të papërgjegjshëm, Llaban jo vetëm që nuk duhet të dekretohet si gjykatës i Gjykatës Kushtetuese të Kosovës, por ndaj tij duhet të fillojnë hetimet për paraqitje të pavërtetë të fakteve, fshehje të së vërtetës dhe falsifikim të dokumenteve”, thuhet në reagim.