Kolona 10 kilometra në tunelin e Gotthardit, deri në 100 minuta pritje për drejtuesit e mjeteve

Fluksi i pushuesve ka shkaktuar radhë të gjata drejt jugut të Zvicrës, ndërsa autoritetet rekomandojnë durim ose rrugë alternative.

Pushimet verore kanë sjellë sërish kolona të gjata në hyrje të tunelit të Gotthardit. Që në orët e para të mëngjesit të së shtunës, radha e automjeteve kishte arritur në 10 kilometra, përcjell albinfo.ch.

Sipas të dhënave të TCS, drejtuesit e mjeteve që udhëtojnë drejt jugut të Zvicrës duhet të llogarisin rreth 100 minuta pritje për të kaluar tunelin.

Trafiku i rënduar është bërë tashmë i zakonshëm gjatë fundjavave të sezonit veror, kur mijëra pushues nga Zvicra dhe vendet fqinje nisen drejt destinacioneve në Itali.

Ndërkohë, lajmi pozitiv për udhëtarët është se tuneli i San Bernardinos dhe autostrada A13 në afërsi të Churit nuk raportojnë bllokime, duke mbetur alternativa kryesore për ata që dëshirojnë të shmangin kolonat në Gotthard. /Albinfo.ch

---