Kolona kilometërshe në kufirin Serbi–Kroaci, mërgimtarët përballen me pritje të gjata

Fluksi i madh i automjeteve gjatë kthimit nga pushimet verore ka shkaktuar radhë të gjata në pikëkalimin kufitar Batrovci–Bajakovo.

Kolona të gjata automjetesh janë krijuar në pikëkalimin kufitar Batrovci–Bajakovo, mes Serbisë dhe Kroacisë, si pasojë e fluksit të madh të mërgimtarëve që po kthehen drejt vendeve të Evropës Perëndimore pas pushimeve verore, transmeton albinfo.ch.

Në këtë pikë kufitare janë regjistruar pritje të gjata dhe kolona kilometërshe, ndërsa qindra automjete po presin për të kaluar kufirin.

Autoritetet u kanë bërë thirrje udhëtarëve të tregojnë durim, të respektojnë udhëzimet e shërbimeve kufitare dhe, nëse është e mundur, të planifikojnë udhëtimin me kohë ose të shfrytëzojnë pika alternative të kalimit.

Fluksi i shtuar i mërgimtarëve pritet të vazhdojë edhe gjatë ditëve në vijim, pasi shumë bashkatdhetarë po përfundojnë pushimet në Kosovë dhe vendet e rajonit.

Kufiri Serbi–Kroaci konsiderohet çdo verë një nga pikat më të ngarkuara të tranzitit për mërgimtarët nga Kosova dhe vendet e tjera të Ballkanit që udhëtojnë drejt shteteve të Bashkimit Evropian./Albinfo.ch

---