Komiteti Olimpik Ndërkombëtar përuron selinë e re në Lozanë

IOC Media (Youtube)

Komiteti Olimpik Ndërkombëtar (IOC) ka përuruar selinë e re në vlerë prej 147 milionë dollarësh në qytetin e Lozanës në Zvicër, shkruan swissinfo.ch.

Përurimi përkoi me 125-vjetorin e organizatës, që po përgatitet ta zgjedhë qytetin nikoqir për Olimpiadën Dimërore 2026, përcjell albinfo.ch.

Siç raporton swissinfo.ch, struktura moderne nga qelqi dhe çeliku, me një sipërfaqe prej 22000 metrash katrorë, kushton 145 milionë franga (147 milionë dollarë) dhe do të mbledhë nën një çati 500 punëtorë.

Nga IOC thonë se kjo ndërtesë “është një nga më të qëndrueshmet në botë”. Ajo ka fituar çmime të shumta ndërkombëtare dhe zvicerane për qëndrueshmëri. Energjia e rinovueshme sigurohet duke përdorur panelet diellore në çati dhe pompat që marrin ujë nga Liqeni i Gjenevës.