Kompania japoneze farmaceutike shkurton 280 vende pune në Cyrih

Gjiganti farmaceutik Takeda Pharmaceutical Company planifikon largime nga puna në selinë e tij evropiane në Opfikon, si pjesë e një programi global kursimesh.

Kompania japoneze farmaceutike Takeda Pharmaceutical Company ka njoftuar se planifikon të shkurtojë rreth 280 vende pune në selinë e saj evropiane në Opfikon, pranë Cyrihut, transmeton albinfo.ch.

Sipas planit të ristrukturimit, rreth një në katër vende pune në këtë qendër pritet të preket nga shkurtimet. Aktualisht në selinë evropiane të kompanisë punojnë rreth 1,150 punonjës.

Kjo masë është pjesë e një programi global kursimesh të kompanisë, i cili synon të reduktojë shpenzimet me rreth një miliard franga zvicerane.

Shkurtimet e vendeve të punës konsiderohen si një tjetër sinjal se industria farmaceutike në Zvicër po përballet me presione në rritje dhe sfida të reja ekonomike./Albinfo.ch

---