Komuna e Prizrenit ta rishikojë procesin e ndarjes së subvencioneve për kulturë

Organizata jo qeveritare “EC Ma Ndryshe” ka reaguar lidhur me ndarjen e subvencioneve për kulturë dhe sport në komunën e Prizrenit.

“EC Ma Ndryshe” thotë se çështja e parë problematike në këtë proces është emërimi i anëtarëve të Komisionit për shqyrtimin dhe vlerësimin e kërkesave, aplikacioneve  të individëve dhe subjekteve të ndryshme nga fusha e kulturës dhe rinisë të cilat kanë aplikuar në thirrjen publike për mbështetje financiare nga lëmi i kulturës dhe rinisë në komunën e Prizrenit për vitin 2018, përcjell albinfo.ch.

“Çështja e dytë që meriton vëmendje në këtë proces është se Komisioni për shqyrtimin dhe vlerësimin e kërkesave ka propozuar subvencionimin e dy OJQ-ve, anëtaret e të cilave janë njëherësh anëtare të Komisionit në fjalë, ani pse ato paraprakisht janë nominuar si përfaqësuese të grupeve të organizatave.  Dhe çështja e tretë sfiduese në lidhje me ndarjen subvencioneve për kulturë dhe rini është ndarja e mjeteve për ShKA “Agimin”. Në përgjigjen e DKRS-së thuhet se këto mjete do të menaxhohen nga strukturat udhëheqëse të SHKA “Agimi” dhe se kjo do të monitorohet nga Komuna përmes Komisionit për mbikëqyrjen apo monitorimin e realizimit të projekteve”, thuhet në reagim, transmeton albinfo.ch.

Kjo organizatë i rekomandon kryetarin e Komunës që të zbatojë dispozitat e rregullores 04/2017 të Ministrisë së Financave mbi kriteret, standardet dhe procedurat e financimit publik të OJQ-ve, ashtu që të emëruarit politik të mos jenë anëtarë të Komisionit vlerësues.