Komuniteti Politik Evropian në nëntor mblidhet në Hungari, vitin e ardhshëm në Shqipëri

Kryeministri i Shiqpërisë, Edi Rama, ka njoftuar se Shqipëria do ta mikpresë vitin e ardhshëm Samitin e Komunitetit Politik Evropian, përcjell albinfo.ch.

Paraprakisht, Komunitetit Politik Evropian do të mblidhet në nëntor në Hungari.

Rama ka thënë se deri dje s’mund të imagjinohej që të respektoheshim si të barabartë në arenën ndërkombëtare, “e të bëheshim stacion europian”.

“…dhe me lajmin e bukur se Shqipëria do të mikpresë vitin tjetër Samitin e Komunitetit Politik Europian, si një tjetër fakt kuptimplotë i pozicionit të ri të vendit tonë në arenën ndërkombëtare, ku deri dje jo vetëm s’mund të imagjinohej të respektoheshim si të barabartë e të bëheshim stacion europian aktivitetesh të nivelit më të lartë politik, po shikoheshim si një periferi e prapambetur ballkanike, ju uroj të gjithëve një ditë të mbarë”, ka shkruar Rama.

Ky samit, këtë vit është mbajtur në Mbretërinë e Bashkuar.

Kryeministri i sapozgjedhur i Britanisë, Keir Starmer, mirëpriti rreth 45 udhëheqës të qeverive në një takim për të të diskutuar mbi imigracionin, sigurinë energjetike dhe kërcënimin nga Rusia, ndërsa ai kërkon të rimëkëmbë marrëdhëniet me vendet fqinje të Bashkimit Evropian katër vjet pas brexitit.