Komuniteti Shqiptar në Martigny ndihmon familjet kosovare

Ndihmat e mërgimtarëve nga Zvicra i’u shpërndan familjeve të dëshmorëve të kombit si dhe familjeve nevojtare të cilat ende jetojnë në kushte të vështira jetese

Me rastin e festës së Fitër Bajramit, shoqata “Komuniteti Shqiptar në Martigny” me seli në Zvicër, shpërndau ndihma për 53 familje në Kosovë.  Ndihmat i’u shpërndan familjeve të dëshmorëve të kombit si dhe familjeve nevojtare të cilat ende jetojnë në kushte të vështira jetese, njofton Ministra kosovare e Diasporës.

Me këtë rast, familjet të cilat përfituan nga këto ndihma shprehën falënderimet e tyre të përzemërta, duke theksuar nevojën për përkrahje më të madhe institucionale, por duke mos anashkaluar ndihmat që i pranojnë nga ana e bashkatdhetarëve tanë të cilët jetojnë dhe veprojnë në diasporë.

Pakoja e parë  me gjëra të ndryshme  ushqimore  i’u dhurua familjes Vitia, në fshatin Bardhosh të Prishtinës ku prezent ishte edhe Ministri i Diasporës, Ibrahim Makolli.

“U jemi mirënjohës dhe shumë falënderues shoqatës “Komuniteti Shqiptar në Martigny”, shoqatë e cila në mënyrë të vazhdueshme përkrah dhe ndihmon bashkëkombësit e tyre. Kjo ndihmë e ofruar tregon angazhimin e madh të kësaj shoqate për të kontribuar sadopak në zhvillimin e mirëqenies sociale të qytetarëve të Kosovës, në zbutjen e varfërisë si dhe ngritjen e nivelit jetësorë të tyre”, deklaroi Makolli.

Ministri më tutje shprehi falënderime ndaj të gjithë pjesëtarëve të diasporës shqiptare të cilët për asnjë moment, për vite të tëra, si para luftës ashtu edhe pas përfundimit të saj, nuk u ndalën së ndihmuari Kosovën dhe qytetarët e saj, si në ndihma humanitare po ashtu edhe me anë të përkrahjes së tyre edhe në fusha të tjera.

Përfaqësuesit e shoqatës “Komuniteti Shqiptarë në Martigny” u ndien të privilegjuar dhe krenar që patën rastin të ndihmojnë këto familje, në mënyrë sado modeste, por shumë domethënëse për përfituesit e tyre.

“Ne si shoqatë nuk do të ndalemi asnjëherë së ndihmuari qytetarët e Kosovës në çfarëdo mënyre të mundshme. Edhe pse në gurbet, zemrat tona janë gjithmonë në Kosovë së bashku me të gjithë ju”, deklaroi përfaqësuesi i kësaj shoqate, njofto MeD.

Vizitat më tej vazhduan në familje të tjera në Llukar, Fushë Kosovë, Lipjan, Gjilan, Mitrovicë, Malishevë dhe në vende të tjera të Kosovës.