Konfirmimi për sjelljen e 95 mijë vaksinave në Kosovë ishte meritë edhe e mjekëve nga diaspora

Konfirmimi për sjelljen e 95 mijë dozave të vaksinave në Kosovë, që u bë nga presidentja e Bashkimit Evropian, Ursula Von Der Leyen, është edhe meritë e punës dhe angazhimit të Federatës së Mjekëve Shqiptarë në Evropë (AMFE), përcjell albinfo.ch.

Më 29 mars Federata i kishte adresuar një letër presidentes Ursula Von Der Leyen, me nënshkrimet nga përfaqësues të 21 vendeve të BE- së – që të gjithë mjekë shqiptarë që punojnë nëpër institucionet shëndetësore më me renome në këto vende, në krye me drejtuesen Aurora Dollenberg – duke sensibilizuar strukturat ndërkombëtare, lobuar dhe apeluar për nevojën e vaksinimit të shpejtë dhe të pandërprerë në vendet shqipfolëse të Ballkanit.

Kësaj letre i ishte përgjigjur me shpejtësi (brenda ditës) presidentja Von der Leyen, duke treguar gatishmëri për detajimin e strategjisë së sigurimit të shpejtë të vaksinave për qytetarët shqiptarë në Ballkan.

Shumë herë heronjtë e vërtetë nuk shihen gjëkundi në publik. Por, për ta më e rëndësishme është arritja e qëllimit, sesa proklamimi publik.

Për Federatën e Mjekëve Shqiptarë në Evropë, më e rëndësishme se çdo gjë tjetër është ruajtja e shëndetit të qytetarëve dhe familjeve tona në Kosovë, Shqipëri e gjetiu.

Angazhimi i jashtëzakoshëm i Mjekëve dhe profesionistëve të Federatës po jep frytet e para në arritjen e shpejtë të imunitetit të popullatës. Falënderojmë të gjithë mjekët e profesionistët që kontribuojnë vullnetarisht në Federatë për sigurimin e vaksinave.