Kongresmeni amerikan: Në Kosovë çdo amerikan ndihet si në shtëpinë e vet

Kongresmeni amerikan, Steven Palazzo, i cili po qëndron për një vizitë në Kosovë, u takua me zëvendëskryeministrin dhe njëherësh ministri e Jashtëm të Kosovës, Behgjet Pacolli

Çdo amerikan në Kosovë ndihet si në shtëpinë e vet, prandaj jam falënderuar për mikpritjen në Prishtinë, ka deklaruar kongresmeni amerikan, Steven Palazzo, i cili po qëndron për një vizitë në Kosovë. Ai sot është takuar edhe me zëvendëskryeministrin dhe njëherësh ministri e Jashtëm të Kosovës, Behgjet Pacolli.

“Gjatë bisedës së ngrohtë dhe miqësore, ministri Pacolli e njohu bashkëbiseduesin me përpjekjet e tij për të rritur njohjet e Kosovës anembanë globit, aktivitet në të cilin ka gjithmonë bashkëpunimin dhe mbështetjen e SHBA-ve”, theksohet në komunikatë për media lëshuar nga MPJ.

Në takim me Pacollin, kongresmenin amerikan Palazzo, e shoqëruan edhe nga përfaqësues të Ambasadës amerikane në Prishtinë. “Ne, i jemi mirënjohës për gjithë jetën SHBA-ve”, i ka thënë Pacolli, kongresmenit Palazzo.

“Në këto 10 vjet jetë të pavarur, ne po përpiqemi të ndërtojmë një shoqëri të civilizuar dhe po ecim para, megjithëse kemi bërë dhe gabime”, ka vazhduar kreu i diplomacisë kosovare.