Konjufca dhe Haxhiu vlerësojnë lartë figurën dhe veprat e Rexhep Qosjes

Konjufca nënvizoi se, sipas Qosjes, lufta për liri ndërtohet mbi vetëdijen kombëtare si themel të shtetformimit

Zëvendëskryeministri i Kosovës, Glauk Konjufca, gjatë seancës së veçantë të mbajtur në Kuvendin e Kosovës në nderim të akademikut Rexhep Qosja, vlerësoi lart figurën dhe veprën e tij, duke e cilësuar si një nga intelektualët më të rëndësishëm të kombit shqiptar.

“Qosja ishte një nga intelektualët, shkrimtarët dhe veprimtarët më të rëndësishëm të kombit tonë”, tha Konjufca, duke theksuar se veprimtaria e tij u udhëhoq nga një ideal i vetëm suprem: liria kombëtare.

“Cili ishte principi i Qosjes? Elani i tij ishte liria kombëtare. Prandaj, gjithçka që prodhoi mori formën e luftës kundër shtypjes”, u shpreh ai, transmeton albinfo.ch.

Konjufca nënvizoi se, sipas Qosjes, lufta për liri ndërtohet mbi vetëdijen kombëtare si themel të shtetformimit.

“Lufta është strategji. Bazamenti i saj i parë, shtresa e themelit, është vetëdija. Mbi të pastaj ndërtohet e sigurt ngrehina e shtetit kombëtar”, deklaroi ai.

Duke folur për rolin e Qosjes në formësimin e identitetit kombëtar, Konjufca tha se ai me të drejtë është quajtur “rilindësi i fundit”.

“Qosja besonte se, duke qenë një komb i rrënjosur në gjuhë, unifikimi gjuhësor i shqiptarëve ishte procesi i domosdoshëm për unitetin e vetëdijes kombëtare”, theksoi Konjufca.

Kryetarja e Kuvendit, Albulena Haxhiu, vlerësoi lart figurën e Qosjes, duke theksuar ndikimin e tij në ndërtimin e vetëdijes historike dhe intelektuale të shqiptarëve.

“Qosja ishte njëri nga njerëzit që e shndërroi kulturën shqiptare në hapësirë mendimi, polemike dhe vetëdije e përgjegjësie historike”, tha Haxhiu.

Ajo theksoi se Qosja jetoi dhe krijoi në një kohë sfiduese për shqiptarët, kur kërkohej vazhdimisht dëshmimi i identitetit kombëtar. “Kësaj kohe ai u përgjigj me vepra, me studime, polemika, qëndrime publike dhe me një disiplinë intelektuale që rrallë shihet në jetën tonë publike”, u shpreh ajo.

Haxhiu shtoi se mendimi i Qosjes u ndërtua mbi vlerat e Rilindjes Kombëtare dhe humanizmit, ndërsa si shkrimtar ai dëshmoi rolin e letërsisë si ndërgjegje shoqërore.

“Si shkrimtar ai dëshmoi se letërsia mund të jetë njëkohësisht art dhe ndërgjegje”, deklaroi ajo.

 

---