Konsullata në Cyrih dhe Shoqata e Krijuesve Shqiptarë në Zvicër bëjnë promovimin e disa librave

Mësohet se Konsullata në Cyrih dhe Shoqata e Krijuesve Shqiptarë në Zvicër kanë bërë aktivitete të përbashkëta të diplomacisë kulturore, bëhet promovimi i dy veprave letrare, transmeton albinfo.ch.

Pas një pauze relativisht të gjatë dhe kufizimeve në lidhje me promovimin e aktiviteteve të diplomacisë kulturore, të dielën në ambientet e Konsullatës së Republikës së Kosovës në Cyrih u mbajt një aktivitet i kësaj natyre, ku të pranishëm ishin studentë, shkrimtarë dhe përfaqësues të ndryshëm nga shoqatat kulturore në Konfederatën e Zvicrës.

Më këtë rast, u promovuan edhe veprat letrare të autoreve Kimete Kuqi Durmishi dhe Drita Sadiku Bilalli. ‘’Jam ajo që isha’’, ‘’Kthimi në jetë’’ dhe ‘’Melodi e qetë’’, ishin tri veprat të promovuara të autores Berisha, ndërsa promovimi tjetër ishte romani ‘’Vrragë plagësh në vellon e mërgimit’’, i autores Sadiku Bilalli.

Ky aktivitet u organizua nga Konsullata e Republikës së Kosovës në Cyrih dhe Shoqata e Krijuesve Shqiptarë në Zvicër.

Të pranishmit i ka përshëndetur me fjalë rasti Udhëheqësi i Konsullatës në Cyrih, z. Sami Kastrati dhe Këshilltarja në Konsullatë, znj Shukrije Ramadani, ndërsa debati u moderua nga Kryetari i Shoqatës së Krijuesve Shqiptarë në Zvicër, z. Bujar Salihu, i cili bëri edhe prezantimin e librave dhe të autoreve.

Recitimi i poezive ishte e veçanta e kësaj mbrëmjeje letrare, ndërsa të pranishmit shtruan pyetje të shumta për autoret dhe botimet e veprave të tyre.

Konsullata e Republikës së Kosovës në Cyrih gjatë muajit nëntor do të vazhdojë me aktivitete të tjera të diplomacisë kulturore.