Koordinohen për ndërmarrjet e vogla

Iniciativa paraqet një bashkëpunim të institucioneve shtetërore dhe ndërmarrjeve private në vlerësimin e projekteve

Agjencia për Mbështetjen e Ndërmarrjeve të Vogla dhe të Mesme që vepron në kuadër të Ministrisë së Tregtisë dhe Industrisë, ka organizuar tryezë të rrumbullakët me temën “Iniciativa e Ballkanit Perëndimor për Konkurrencë Regjionale”.

Tryeza pati për qëllim shqyrtimin e 16 shembujve të pilot-projekteve potenciale, që do të ndihmonin ndërmarrjet dhe afaristët kosovarë për të qenë konkurrues në tregun e gjithëmbarshëm.

Kjo iniciativë paraqet një bashkëpunim të institucioneve shtetërore dhe ndërmarrjeve private në vlerësimin e projekteve, shkruan Telegraf.

Të pranishëm në tryeze ishin përfaqësues të institucioneve qeveritare, donatorë, përfaqësues të komunitetit të biznesit nga Oda Ekonomike e Kosovës dhe Oda Ekonomike Amerikane, afaristë dhe përfaqësues të institucioneve arsimore.

Në këtë takim u arrit të bëhet përzgjedhja e projektit “Shqyrtimi i kornizës së politikave gjithëpërfshirëse për inovacionet”.

Përmes këtij projekti synohet të arrihet një kornizë për themelimin e një shoqate apo organi për koordinimin e politikave në sferën e inovacioneve.

Ministrja e Tregtisë dhe Industrisë, Mimoza Kusari– Lila, ka theksuar se kjo iniciativë pason diskutimet e zhvilluara para disa muajsh për hapat e ardhshëm dhe format e bashkëpunimit në këtë çështje, sidomos në ngritjen e kapacitetit të personelit në institucione dhe ndërmarrje vendore.

Iniciativa e Ballkanit Perëndimor për Konkurrencën Rajonale është një projekt i Organizatës për Bashkëpunim dhe Zhvillim Ekonomik OECD që financohet nga Komisioni Evropian.

Ky projekt ka për qëllim përkrahjen e aftësive konkurruese afatgjate të rajonit përmes punës në zhvillim të kapitalit njerëzor dhe forcimit të kapaciteteve inovative.