Kopja identike 400 vjeçare e Mona Lisës del në ankand

Një kopje identike e pikturës së famshme “Mona Lisa”, krijuar më shumë se 400 vjet më parë, pritet të dalë në ankand të martën e 9 nëntorit. Piktura origjinale e Leonardo Da Vinci-t, të cilën mbreti francez Francois 1 e bleu nga vetë piktori në vitin 1518, gjendet në Muzeun e Luvrit në Paris dhe nuk është në shitje.

Por një kopje thuajse origjinale, madje e padallueshme prej saj, që daton në vitin 1600, do të dalë në shitje nga shtëpia e ankandit “ArtCurial”. Paraprakisht “Mona Lisa” pritet të shitet 150 deri në 200 mijë euro.

“Mona Lisa është gruaja më e bukur në pikturë. Është padyshim piktura më e famshme në historinë e artit perëndimor. Ndaj çdokush flet për të. Është piktura për të cilën mund të flasësh edhe në radio, pa patur nevojë ta shohësh. Është piktura që i flet njerëzve nga Pekini në San Francisco”. Të gjithë e kuptojnë dhe e njohin Mona Lisën dhe secili prej nesh do ta donte një version aq të bukur sa origjinali i Mona Lisës. Edhe da Vinci kishte fansat e tij sepse ai krijoi stilin e tij. Kishte ndjekësit, imituesit dhe mbi të gjitha sponsorë të fortë, që paguan që arti i tij të shitej shtrenjtë. Da Vinci ishte artisti më i famshëm i periudhës së tij”, shprehet shtëpia e ankandit “ArtCurial”, transmeton A2 CNN përcjell Albinfo.ch.

Në qershor të këtij viti, një koleksion europian bleu një tjetër kopje të Mona Lisa-s, të shekullit XVII për shumën 2.9 milionë euro, një rekord për riprodhimin e një vepre kaq të famshme.