Kosova dhe Zvicra përballen për herë të parë në basketboll

Ky takim do të zhvillohet në Prizren, të mërkurën, nga ora 20:45

Kosova dhe Zvicra do të ndeshen për herë të parë në basketboll, takim ky që do të zhvillohet në Prizren, të mërkurën, nga ora 20:45.

Kjo ndeshje zhvillohet në kuadër të Rrethit të Tretë Parakualifikues për Eurobasket 2025, shkruan albinfo.ch.

Biletat kanë dalë në shitje dhe kushtojnë 3 euro, ndërsa do të shiten në Prishtinë dhe Prizren, njofton FBK.

Përzgjedhësi i Kosovës, Rami Hadar, ka thënë se kanë bërë progres dhe janë të gatshëm për këtë sfidë, ndërsa kapiteni Dardan Berisha ka kërkuar ndihmën e publikut.

Kjo është hera e parë që Kosova luan në qytetin e Prizrenit.

Pjesë e këtij grupi është edhe Danimarka. Vetëm vendi i parë kualifikohet tutje.

Ndërkohë, ndeshja Zvicër-Kosovë do të zhvillohet në Fribourg, më 29 korrik.

---