Kosova drejt Evropës pa viza

Shefja për Politikë të Jashtme dhe Siguri e Bashkimit Evropian, Federica Mogherini përmes një postimi në Twitter ka përshëndetur ratifikimin e Marrëveshjes së demarkacionit me Malin e Zi.

“Lajm i mirë nga Prishtina, ratifikimi i marrëveshjes së demarkacionit me Malin e Zi. Kosova drejt liberalizimit të vizave për në BE për popullin e saj”, ka shkruar ajo, përcjell albinfo.ch.

Raportuesja në Parlamentin Evropian për çështjen e regjimit të vizave për Kosovën, Tanja Fajon thotë se me ratifikimin e Marrëveshjes së demarkacionit me Malin e Zi, është hequr një pengesë e madhe për Kosovën.

Ajo thotë se do të bëj “më të mirën” që qytetarët e Kosovës shumë shpejt të lëvizin pa viza, duke shtuar se Kosova nuk ka qenë kurrë “më afër Evropës”.

“E lumtur me lajmin pozitiv nga Kosova për ratifikimin e Marrëveshjes së demarkacionit. Një pengesë e rëndësishme është tejkaluar dhe është në të mirën e të gjithë qytetarëve të Kosovës. Unë do të bëj më të mirën e mundshme që liberalizimi i vizave të bëhet shumë shpejt realitet. Kosova nuk ka qenë kurrë më afër Evropës”, ka shkruar Fajon në një postim në Twitter.