“Kosova e Re” nuk ka gjasa që të fillojë para vitit 2013

Punimet për ndërtimin e termocentralit “Kosova e Re” nuk ka gjasa që të fillojnë para vitit 2013.

Pas marrjes së vendimit nga Qeveria e Republikës së Kosovës për rikonfigurimin e Komitetit Drejtues të Projektit, sipas ndryshimeve organizative në strukturën qeveritare dhe pas marrjes edhe të pëlqimit nga Banka Botërore, e cila është partner në këtë projekt, kanë rifilluar të mbahen takimet e këtij komiteti, detyra kryesore e të cilit është finalizimi i kërkesës për propozime-tenderi.

Në shtator të këtij viti pritet që të shpallet tenderi për ndërtimin e termocentralit “Kosova e Re”, ndërsa në mars të vitit 2012 pritet që të shpallet kompania fituese për realizimin e këtij projekti, bëjnë të ditur zyrtarë të Ministrisë së Zhvillimit Ekonomik, shkruan Kosova Sot.

Menaxher i projektit, Lorik Haxhiu i ka thënë kësaj të përditshmeje, deri në fund të vitit të ardhshëm do të përfundojë i tërë procesi, ndërsa punimet në terren për ndërtimin e termocentralit, sipas tij, do të nisin në fillim të vitit 2013.