Kosova edhe pas 1 janari me regjim vizash me një shtet

Nga 1 janari qytetarët e Kosovës udhëtojnë pa viza, por jo edhe me shtetin e Bosnjë e Hercegovinës.

Kryeministri i Kosovës, Albin Kurti, tha se qytetarët do të duhet të pajisen me viza për në Bosnjë e Hercegovinë dhe anasjelltas, edhe pas datës 1 janar 2024.

Kurti tha se një marrëveshje nuk është ratifikuar nga Bosnjë e Hercegovina dhe prandaj do të duhen vizat për atje, edhe pas datës 1 janar 2024, kur pritet të liberalizohen vizat.

“Me këtë rast në adresimin tim unë theksova se është për të ardhur keq që ka edhe vende që nuk i kanë ratifikuar këto marrëveshje, të cilat i kemi bërë në të kaluarën dhe në veçanti duhet theksuar faktin se nga ato 3 marrëveshje që i patëm bërë aso kohe njëra prej tyre nuk është ratifikuar nga Bosnjë e Hercegovina, dhe për pasojë më 1 janar 2024 të gjithë qytetarët do të mund të udhëtojnë pa viza në BE, mirëpo do të nevojiten viza për të qarkulluar nga Kosova për në Bosnjë e Hercegovinë dhe anasjelltas për shkak se atje nuk është ratifikuar edhe marrëveshja që ka të bëjë me qarkullimin e lirë me ID karta”, tha Kurti.