Kosova i mbanë sytë ka investitorët evropianë

Kryeministri i Kosovës, Isa Mustafa ka thënë se bartja e dijes dhe e teknologjisë nga investitorët evropianë, paraqet kontribut afatgjatë për ekonominë e Kosovës

Bashkimi Evropian paraqet partnerin kryesor ekonomik të Kosovës, me pjesëmarrje në eksporte dhe importe me mbi 40 për qind, dhe pjesëmarrjen e investimeve të huaja direkte me mbi 50 për qind. Kështu ka deklaruar kryeministri i Republikës së Kosovës, Isa Mustafa, në hapjen e platformës së dialogut të Investitorëve Evropianë me Qeverinë e Kosovës.

“Ky partneritet i referohet një klime të favorshme ekonomike që Kosova po ofron, i referohet përfitimeve përkatësisht benefiteve të investitorëve dhe ekonomisë së Kosovës. Si shembull i mirë i këtyre përftimeve është edhe sektori financiar, përkatësisht bankar, i cili po punon dhe po tregon efekte pozitive dhe multiplikative për ekonominë tonë. Shembuj tjerë të suksesit ka edhe në fusha të tjera”, citohet të ketë thënë kryeministri Mustafa.

Të pranishëm në këtë ngjarje ishin edhe shefi i Zyrës së BE-së në Kosovë, Samuel Zhbogar, kryesuesi i Këshillit të Investitorëve Evropianë, Emmanuel Mitsou dhe përfaqësues të institucioneve, bizneseve dhe ekspertë të ekonomisë.

Më tej thuhet se kryeministri Mustafa ka thënë se bartja e dijes dhe e teknologjisë nga investitorët evropianë, paraqet kontribut afatgjatë për ekonominë e Kosovës në mënyrë që këto përvoja të merren dhe të implementohen në Kosovë.

“Presim që investitorët evropianë të jenë promotorët kryesorë edhe për investime të reja, aq të nevojshme për ekonominë tonë, falë potencialit ekonomik me të cilin disponon Kosova dhe klimës së favorshme të cilën ne po e ndërtojmë këtu. Ne e kemi një treg të punës shumë të përshtatshëm, një treg të punës fleksibil, një popullatë të re, me moshë mesatare prej 26 vjeç, me paga mesatare më të ulëta se sa në vendet në rajon dhe me sistem edukimi i cili është në përmirësim e sipër”, tha Mustafa.

Sa i përket sektorëve më potencialë, kryeministri përmendi sektorin e teknologjisë informative, sektorin e agrobiznesit, sektorin e përpunimit të drurit, minierave, energjisë, turizmit, përpunimin e tekstilit, përpunimin e lëkurës, “për të cilat ne kemi pas dhe kemi përvoja dhe të cilat mund ta gjejnë edhe tregun vendor, tregun regjional dhe atë evropian”.