Kosova mban në fuqi masat e reciprocitetit me BeH

Kjo ndodh për shkakun se BeH kontakton në adresë të UNMIK-ut, e jo të institucioneve të Kosovës

Bosnja e Hercegovina, ka pranuar zyrtarisht vulat e Doganave të Kosovës, por kjo nuk e ka ndryshuar vendimin e institucioneve kosovare për masat e vendosura të reciprocitetit ndaj këtij vendi.

E gjithë kjo ka ndodhur për shkak të dërgimit të këtij njoftimi nga BeH në adresë të UNMIK-ut, e jo të institucioneve të Kosovës.

Në letrën që mban datën 21 shtator, të nënshkruar nga ministri për Tregti të Jashtme dhe Marrëdhënie Ekonomike, Mlladen Zirojeviq, sqarohet se Bosnja pranon vulat që janë të pranuara edhe nga UNMIK-u dhe që shpreson se marrëdhëniet ekonomike do të rregullohen në bazë të marrëveshjes së CEFTA-s të 2006-ës.

Derisa ky shtet nuk e dërgon vendimin te Ministria e Tregtisë dhe e Industrisë, masa doganore prej 10% do të vazhdojë të vlejë, raporton televizioni i Prishtinë, KTV.