Kosova, shtet me më pak se dy milionë banorë

Faktorët që ka ndikuar që shteti i ri të mos i ketë as dy milionë banorë është imigrimi i vazhdueshëm i kosovarëve

Regjistrimi i popullsisë së Kosovës i filluar më një prill dhe i përfunduar mbrëmë në orën 24:00, përfundimisht Kosovën e ka nxjerrë shtet me më pak se dy milionë banorë, shkruan sot gazeta Koha Ditore.

Numrin e banorëve nuk e ka shtuar as afati shtesë për regjistrim të popullsisë, që vazhdoi në disa komuna të Kosovës, duke i përfshirë ato me shumicë serbe, por jo edhe veriun e Mitrovicës. 

Një ndër faktorët që ka ndikuar që shteti i ri të mos i ketë as dy milionë banorë është imigrimi i vazhdueshëm i kosovarëve në shtetet evropiane, ka theksuar për Kohën Ditore, drejtori i Zyrës për Regjistrimin e Popullsisë në Entin e Statistikave të Kosovës, Sabri Zabërgja.

Ai ka treguar se regjistrimit të popullsisë i janë përgjigjur pothuajse qind për qind qytetarët e Kosovës, duke i përfshirë në listën suplementare edhe qytetarët kosovarë që jetojnë në diasporë.

“Më shumë se 98 për qind e popullatës rezidente është regjistruar dhe zyrtarisht regjistrimi ka përfunduar të martën në orën 24 në 34 komuna të Kosovës.

700 deri 850 mijüe kosovarë jetojnë jashtë vendit

Nga ky proces është parë se një numër i madh i kosovarëve jetojnë jashtë vendit dhe numri i tyre sillet prej 700-850 mijë banorë, dhe ky emigrim ka ndikuar që numri i banorëve rezidentë të Kosovës të mos e arrijë dymilionëshin”, ka treguar drejtori Zabërgja.

Drejtuesit e Komisionit Qendror për Regjistrimin thonë se përveç pjesës veriore të vendit, ku ende nuk ka nisur regjistrimi, procesi përgjithësisht është zhvilluar në rregull.  

Kryetari i komisionit, Rifat Blaku tha për Radion Evropa e Lirë se “aktualisht janë duke u përpunuar të dhënat dhe së shpejti do të bëhen të ditura rezultatet”.

Blaku tha se janë duke u bërë përgatitjet për fillimin e regjistrimit për veriun e Kosovës, por nuk dha detaje të tjera.