Kosovari i paguan mijëra euro serbit për ta sjellë në Gjermani

Ndërkohë, serbi, një 47 vjeçar me qëndrim në Zvicër, tha se kosovarin e kishte marrë në makinë "rastësisht" gjatë rrugës

Policia në Airing, Traunstein, Gjermani ia ka dalë që në momentin e fundit të ndalojë trafikimin e një kosovari në Gjermani. Kjo ka ndodhur të hënën. Një kosovar 20 vjeç i kishte paguar një trafikanti serb mijëra euro për ta sjellë në Gjermani, kanë konstatuar autoritetet.

Serbi dhe kosovari po udhëtonin në autostradën gjermane 304 me një makinë me targa sllovake . Me rastin e kontrollimit, ata treguan dokumentet e tyre të udhëtimit, serbe, respektivisht finlandeze. Por, meqë pasaporta finlandeze dukej e dyshimtë, policët e kontrolluan kosovarin, të cilit i gjetën një pasaportë të Kosovës në xhep, shkruan ovb.online.de.

Ndërkohë, serbi, një 47 vjeçar me qëndrim në Zvicër tha se kosovarin e kishte marrë në makinë, “rastësisht” gjatë rrugës. Meqë ekzistonte dyshimi për trafikim, policia i ndaloi të dy personat. Me hetimet e mëtejme u konstatua se pasaporta finlandeze ishte krejtësisht e falsifikuar.

Në fund, kosovari pranoi para hetuesve se ai i kishte paguar disa mijëra euro “bashkudhëtarit” të tij serb për ta transportuar nga Kosova deri në Austri.

Të dy personat vazhdojnë të mbahen në arrest dhe kundër tyre është nisur procedura përkatëse.