Kosovë: 6 viktima në pak ditë nga aksidentet

Eksperti ngre alarmin pas aksidenteve tragjike: Kosova nuk ka strategji për sigurinë rrugore

Vetëm brenda pak ditësh, gjashtë persona kanë humbur jetën në aksidente të rënda trafiku në Kosovë, duke rikthyer në vëmendje shqetësimet për sigurinë në rrugë. Seria e ngjarjeve tragjike ka nxitur thirrje për masa konkrete dhe një qasje më serioze nga institucionet përgjegjëse, përcjell albinfo.ch.

Eksperti i komunikacionit, Nol Dedaj, vlerëson se përveç shtimit të qarkullimit gjatë sezonit veror, një ndër problemet kryesore mbetet mungesa e një strategjie të mirëfilltë për sigurinë rrugore.

Sipas tij, fluksi i bashkatdhetarëve gjatë muajve korrik dhe gusht rrit ndjeshëm ngarkesën në rrugë, por kjo nuk mund të jetë arsyeja e vetme për numrin e madh të aksidenteve.

“Duhet të hartohet një strategji e qartë për sigurinë rrugore dhe më pas të zbatohet. Kosova ende nuk ka një ligj të posaçëm për sigurinë rrugore, ndërsa mungojnë edhe institutet dhe agjencitë që do të analizonin shkaqet e aksidenteve dhe do të propozonin masa parandaluese”, tha Dedaj në emisionin “Ora 7”.

Ai theksoi se faktori njerëzor mbetet shkaktari kryesor i aksidenteve me pasoja fatale.

“Studimet evropiane tregojnë se rreth 85 për qind e aksidenteve shkaktohen nga faktori njeri. Faktori rrugë ndikon me 8 deri në 10 për qind, automjeti me 3 deri në 5 për qind, ndërsa pjesa tjetër lidhet me menaxhimin e sigurisë rrugore dhe faktorë të tjerë të paparashikueshëm”, u shpreh ai.

Dedaj shtoi se në Kosovë shpejtësia e lartë vazhdon të jetë ndër shkaqet kryesore të aksidenteve me viktima, ndërsa sinjalizimi i dobët dhe problemet me infrastrukturën rrugore e rëndojnë edhe më tej situatën.

Sipas tij, ndryshe nga praktikat në vendet evropiane, në Kosovë shpesh mungojnë analizat dhe ndërhyrjet konkrete në pikat ku aksidentet përsëriten, çka e bën edhe më të vështirë parandalimin e tragjedive të ngjashme në të ardhmen. /Albinfo.ch

---