Kosovë: Arrestohen 22 persona për trafik narkotikësh dhe krim kibernetik

Një operacion i gjerë policor i koduar “Qielli i Thyer” ka rezultuar me arrestimin e 22 personave të dyshuar për përfshirje në trafik ndërkombëtar të narkotikëve dhe krim kibernetik. Aksioni u zhvillua të martën në rajonet e Prishtinës, Pejës, Prizrenit dhe Gjilanit, me kërkesë të Prokurorisë Speciale të Republikës së Kosovës (PSRK), raporton albinfo.ch.

Policia dhe Prokuroria kanë bërë të ditur se gjatë operacionit janë bastisur gjithsej 47 lokacione, ku janë sekuestruar sasi të konsiderueshme të provave materiale. Në mesin e tyre përfshihen lëndë narkotike, 129 vetura, 134.900 euro para të gatshme, 20.040 franga zvicerane, 490 dollarë amerikanë, 13.000 euro para false, 9 orë dore luksoze, 36 armë të ndryshme zjarri, 1.569 fishekë, 1.292 copë municione, një prerëse për paketim të heroinës dhe kokainës, si dhe pajisje elektronike si laptopë, telefona dhe USB.

Po ashtu, autoritetet kanë ngrirë mjete financiare në llogari bankare në vlerë prej 500.000 eurosh dhe kanë vënë nën urdhër ndalues pasuri të paluajtshme që i përkasin të dyshuarve.

Sipas njoftimit zyrtar, operacioni është zhvilluar në bashkëpunim të ngushtë me autoritetet ndërkombëtare, përfshirë ato të Belgjikës, Francës, Holandës dhe Europol-it, të cilat kanë kontribuar në shkëmbimin e të dhënave dhe koordinimin ndërkombëtar të hetimeve. Operacioni është drejtuar nga një prokuror i PSRK-së, i cili ishte i pranishëm gjatë zbatimit të urdhrave të kontrollit.

“Ky është rezultat i një hetimi të gjatë kundër grupeve të krimit të organizuar që kanë qenë të përfshirë në trafikimin ndërkombëtar të narkotikëve, pastrimin e parave dhe forma të tjera të krimit të organizuar. Prokurorët dhe hetuesit kanë punuar në mënyrë të vazhdueshme për shkatërrimin e këtij grupi kriminal,” thuhet në njoftimin e Policisë së Kosovës, raporton albinfo.ch.