Kosovë: Kuvendi miraton projektligjin për pagat

Pas një debati të gjatë, Kuvendi i Kosovës ka miratuar projektligjin për pagat në sektorin publik. 63 deputetë kanë votuar për dhe një abstenoi.

Votimi i 77 amendamenteve sa ka ky projektligj, u përcoll me debate të shumta e me ndërrime të disa prej tyre. Kryetari i Kuvendit, Kadri Veseli, ka thënë se me këtë ligj përfundon anarkia që ishte në këtë sektor për 20 vjet.

Deputetët nuk kanë kaluar amendamentin për heqjen e shtesave që marrin deputetët nga pjesëmarrja në seanca plenare si dhe komisione. Deputetët kanë votuar pro amendamenteve 46, 47 dhe 48, ku përcaktohet koeficienti 7, si tavan për të gjithë punëtorët e ndërmarrjeve publike, përcjell albinfo.ch.

Votimi i këtyre amendamenteve është shoqëruar me debat për pragun e pagës dhe çështjen e mostrajtimit të njëjtë të ndërmarrjeve publike. Deputetët kanë votuar për Projektligjin për organizimin dhe funksionimin e Administratës Shtetërore dhe të agjencive të pavarura si dhe Projektligjin për zyrtarët publikë.