Kosovë: MASHTI largon nga përdorimi doracakët për edukim seksual

Foto: Arberie Nagavci, FB

Ministria e Arsimit, Shkencës, Teknologjisë dhe Inovacionit në Kosovë, sot ka marrë vendim që t’i largojë nga përdorimi doracakët për edukim seksual dhe shëndet riprodhues.

“Duke marrë parasysh shqetësimet e prindërve në adresë të Ministrisë, sqarojmë edhe një herë që nuk ka kurrikulë të veçantë për edukim seksual e as tekste shkollore ku fëmijët mësojnë për edukimin seksual. Edukimi seksual synon të pajisë fëmijët dhe të rinjtë me njohuri të bazuara në fakte shkencore rreth shëndetit seksual dhe riprodhues, dhe i ndihmon të kuptojnë ndryshimet trupore që ndodhin gjatë zhvilimit”, thuhet në njoftim, transmeton albinfo.ch.

Tutje nga kjo ministri kanë njoftuar se doracakët do të largohen nga përdorimi dhe nga faqja zyrtare e MAShTI-t deri në përfundim të rishikimit nga komisioni.

“Ndërkohë, Ministria e Arsimit kërkon nga të gjithë të përmbahen prej gjuhës tejet të papërshtatshme që po përdoret ditët e fundit”, thuhet ndër të tjera në njoftim.