Kosovë: SBASHK paralajmëron grevë në shtator

(KEYSTONE/Gian Ehrenzeller)

Fillimi i vitit të ardhshëm shkollor mund të përcillet me grevë nga mësimdhënësit në Kosovë. Kështu ka paralajmëruar Sindikata e Bashkuar e Arsimit, Shkencës dhe Kulturës (SBASHK), duke theksuar se mungesa e institucioneve funksionale ka pamundësuar adresimin e kërkesave të tyre, shkruan Koha, transmeton albinfo.ch.

Sipas nënkryetares së SBASHK-ut, Vjollca Shala, sindikata është e detyruar të shqyrtojë seriozisht mundësinë e grevës, pasi pa formim të institucioneve nuk ka adresë ku të dërgohen kërkesat.

“Moskrijimi i institucioneve lë shumë ligje për sistemin arsimor që nuk mund të bëhen. Po ashtu, shumë ligje që kërkojnë plotësim dhe ndryshim nuk mund të procedohen. Në këtë situatë jemi pa përfaqësim institucional dhe pa zgjidhje për problemet që na prekin drejtpërdrejt”, ka deklaruar Shala.

Ajo theksoi se SBASHK ka dorëzuar një draft të kontratës kolektive në Ministrinë e Arsimit, por deri më tani nuk është ndërmarrë asnjë hap për negociim. “Jemi i vetmi vend në Evropë që nuk kemi kontratë kolektive të nënshkruar. Kjo është e papranueshme”, tha ajo, transmeton albinfo.ch.

Ndër kërkesat kryesore të sindikatës përmenden ngritja e koeficientit të pagave, i cili nuk është rritur tash e dy vite, zbatimi i Ligjit për Paga, nënshkrimi i kontratës kolektive, përmirësimi i kushteve të punës dhe i cilësisë në arsim.

Vendimi përfundimtar për grevën pritet të merret në një kongres të jashtëzakonshëm që SBASHK do të mbajë së shpejti, transmeton albinfo.ch.