Kosovë: Shënohet rasti i parë i të porsalindurit me COVID-19

Në Kosovë për herë të parë është diagnostikuar një i porsalindur me COVID-19.

Lajmi është bërë i ditur nga Shoqata e Neonatologëve të Kosovës.

Ndërsa, drejtori i Klinikës së Neonatologjisë, Xhevdet Gojnovci ka thënë se i porsalinduri gjendet ne mjekim intensiv, por që gjendja shëndetësore e ka stabile.

“Foshnja është pranuar para dy ditëve në Klinikën e Neonatologjisë me temperaturë. Pas bërjes së analizave, pasiqë nana dhe anëtarët e tjerë të familjes kanë dalë pozitiv, ne ua kemi bërë testin dhe po ashtu foshnja ka rezultuar pozitiv me Covid-19. Ajo ka pneumoni, është me temperaturë dhe gjendet në Kujdesin Intenziv në hapësirën e ndarë vetëm për vetëm për foshnjat me Covid. Kjo është foshnja e parë me Covid pozitiv, 4170 gram pesha trupore. Gjendja e saj është stabile”, tha Drejtori i Klinikës Xhevdet Gojnovci, për Express, përcjell albinfo.ch.

Ndërsa Klinika e Gjinekologjisë ka njoftuar se një shtatzënë është e dyshuar me këtë virus, ndërsa dy persona nga stafi mjekësor kanë rezultuar pozitiv.

Ndërkaq, brenda 24 orëve të fundit, në Kosovë janë shënuar edhe katër viktima nga coronavirusi i ri, duke e çuar në 86 numrin e personave që kanë humbur jetën nga ky virus.