KQZ bëhet gati për zgjedhjet në veri të Kosovës

Komisioni Qendror i Zgjedhjeve mbajti mbledhje të kryesuar nga kryetarja, Valdete Daka. Në fillim të mbledhjes kryetarja Daka bëri të ditur se gjatë ditës së sotme presidenti Hashim Thaçi  ka shpallur Zgjedhjet e Jashtëzakonshme për kryetar të komunave: Mitrovica e Veriut, Zubin Potok, Leposaviq dhe Zveçan.

Në përmbushje të detyrave kushtetuese dhe ligjore, Komisioni Qendror i Zgjedhjeve filloi me përgatitjet e zgjedhjeve në këto komuna, njofton Klan Kosova.

Në mbledhjen e së hënës, KQZ-ja mori vendim për caktimin e afateve të aktiviteteve zgjedhore për Zgjedhjet e Jashtëzakonshme në këto katër komuna, të cilat do të mbahen më 19 maj 2019, shkruan Klan Kosova, përcjell Albinfo.ch.

Disa nga afatet kohore janë si në vijim:

Aplikimi i subjekteve politike dhe kandidatëve do të fillojë më 9 prill dhe do të përfundojë më 18 prill 2019;

Certifikimit dhe publikimi i subjekteve politike dhe kandidatëve do të bëhet më 22 prill 2019;

Hedhja e shortit për renditjen në fletëvotim do të mbahet më 28 prill 2019;

Afati i fundit për të caktuar kufizimin e shpenzimeve për fushatë është data 12 prill 2019;

Fushata zgjedhore si dhe afatet për tubimet zgjedhore do të fillojnë me datë 13 maj dhe do të përfundojnë më 17 maj 2019;

Dorëzimi i kërkesës për akreditimin e organizatave për vëzhgimin e zgjedhjeve dhe vëzhgueseve do të fillojë më 9 prill 2019 dhe do të përfundojë më 12 maj 2019;

Emërimet e Komisioneve Komunale të Zgjedhjeve (KKZ) do të bëhet me datë 15 prill 2019;

Aplikimi për regjistrim si votues jashtë Kosovës do të fillojë më 25 prill dhe do të përfundojë më 30 prill 2019;

Aplikimi për regjistrim si votues me nevoja të veçanta do të fillojë më 9 maj dhe do të përfundojë më 13 maj 2019.