KQZ-ja pret që numërimi i votave të përfundojë të mërkurën

Komisioni Qendror i Zgjedhjeve

Komisioni Qendror i Zgjedhjeve ka thënë se pret që të mërkurën (5 mars) të përfundojë numërimi edhe i votave të fundit, atyre me kusht dhe të personave me aftësi të kufizuara.

Paneli Zgjedhor për Ankesa dhe Parashtresa (PZAP) ka marrë vendim që të pranojë ankesën e Lëvizjes Vetëvendosje për parregullsi gjatë numërimit të votave në Qendrën e Numërimit dhe Rezultateve.

PZAP-ja urdhëroi që 21 fletëvotime nga qendra të votimit të vlerësohen si të vlefshme dhe të përfshihen në rezultatin përfundimtar. Partia në pushtet ishte ankuar për disa fletëvotime, duke thënë se janë shpallur të pavlefshme.

Në arsyetimin e PZAP-së thuhet se më 1 mars ka pranuar ankesë, ku pretendohet nga VV-ja se gjatë procesit të numërimit të votave në QNR në Prishtinë, fletëvotimet janë shpallur të pavlefshme për shkak të një gabimi teknik gjatë shtypjes.

“Sipas parashtruesit të ankesës, theksohet se, konkretisht, bazuar në dispozitat ligjore në fuqi, votuesi duhet ta shtypë/printojë vetë fletëvotimin nga faqja zyrtare e KQZ-së. Gjatë këtij procesi të printimit, vërehet se fletëvotimet përkatëse nuk janë printuar në formë të plotë, ndonëse qëllimi i votuesit është i qartë. Megjithatë, meqë ky nuk është rasti dhe votuesi fillimisht ka printuar fletëvotimin në kushte shtëpie – e diktuar ndonjëherë nga formati i dërguar dhe specifikat teknike e teknologjike – duhet të kihet parasysh qëllimi i votuesit, ashtu siç e përcakton edhe Ligji”, thuhet në njoftimin e PZAP-së