Krasniqi sfidon të gjithë, i përgjigjet EULEX-it negativisht për imunitetin

"Ne ia kemi bërë të ditur EULEX-it, se iniciativën për heqjen e imunitetit mund ta bëjë vetëm Prokurori i Përgjithshëm"

Me gjithë presionin ndërkombëtarë, Kryetari i Kuvendit të Kosovës Jakup Krasniqi nuk lëshon pe. Ai i ka dërguar përgjigjen Misionit Evropian për Sundim të Ligjit, EULEX-it, rreth çështjes së imunitetit të deputetëve që janë nën hetime. Ashtu siç kishte deklaruar ai dje në orët e pasdites ia ka kthyer përgjigjen negative shefit të EULEX-it, Xavier Bout de Marnhac.

Këtë e ka konfirmuar për “Zërin” vetë kryeparlamentari Jakup Krasniqi, i cili ka thënë se letra që i është dërguar EULEX-it, nuk ka pësuar ndryshime përmbajtjesore nga drafti i parë. “Letra ka mbetur e njëjtë. Ka pasur disa ndryshime, të cilat më shumë kanë qenë gjuhësore, se sa përmbajtjesore. Ne ia kemi bërë të ditur EULEX-it, se iniciativën për heqjen e imunitetit mund ta bëjë vetëm Prokurori i Përgjithshëm, bazuar në Nenin 9, pika 3 e Ligjit për Deputetët”, ka thënë Krasniqi.　

Në draft-letër potencohet se bazuar në Kushtetutën e Kosovës, qeveria vetë mund të kërkojë nga Gjykata Kushtetuese interpretim për imunitetin e deputetit.